有日一位先生嚟到診所。
佢行埋嚟登記處：「睇醫生呀，未睇過」
我：「好呀，麻煩你俾身分證我呀」
佢拎出身分證，我就做登記嘅嘢。
我問佢：「有冇藥物敏感呀？」
佢：「有呀」
我：「係，咩藥呀？」
佢諗咗陣：「西藥」
我望望自己面前嘅醫生卡片，確定自己返緊嘅係西醫診所工。
我：「係邊隻西藥呀？你有冇藥名俾我呀？」
佢：「咪西藥囉」
我：「我哋呢度西醫嚟喎？你係對邊一種西藥敏感呀？定係你意思係所有西藥都敏感呀？」
佢：「係呀，總之係西藥就敏感啦」
我：「你嘅敏感會係點呀？即係食完西藥會有咩反應呀」
佢：「會死呀會窒息呀抖唔到氣呀」
我：「咁你知唔知你上次食到抖唔到氣嘅藥係邊一隻藥呀？」
佢：「西藥呀，咪講咗幾次囉」
掉喇叭呀…
我：「我哋呢度西醫嚟喎，開俾你嘅藥都會係西藥嚟喎？如果你對所有西藥都敏感嘅，醫生係開唔到藥幫唔到你喎？你仲要話食完西藥會窒息…」
佢：「佢可以唔開藥俾我呀，我都冇要佢開藥俾我，唔開藥唔駛收藥費呀嘛」
你本來嘅真面目要出現了嗎？
我：「哦～咁呀…好啦，我登記完啦，你坐低等嗌名啦」
佢：「你記得寫明我對所有西藥都敏感呀，會死呀我，會窒息呀，醫生千其唔好開藥俾我呀！」
得啦得啦，知你嚟為張紙啦…下次唔駛作咁大嘅，就咁講唔要藥咪得囉。
Search